ՊԵՏԱԿԱՆ ՆԱԽԱՐԱՐ ԷԿԷՄԷՆ ՊԱՂԸՇ ՊԱՏՐԻԱՐՔԱՐԱՆ ԱՅՑԵԼԵՑ

Պետական Նախարար Էկէմէն Պաղըշ 24 Յուլիս 2010, Շաբաթ ժամը 12.00ին ուղեկցութեամբ ԱԳ Կուսակցութեան Ֆաթիհի շրջանի նախագահ Ահմէտ Պահա Էօղիւթկէնի Պատրիարքարան այցելեց։ Մեծայարգ Նախարարին կողակիցը, որ պիտի ուղեկցէր իրեն, անհանգստութեան պատճառաւ չկրցաւ ներկայ գտնուիլ։

Մեծայարգ Նախարարը Պատրիարքարանի մուտքին դիմաւորուեցան Պատրիարքական Ընդհանուր Փոխանորդ Բարձր. Տ. Արամ Ս. Արքեպս. Աթէշեանի կողմէ։

Սրբազան Հօր բարի գալստեան խօսքէն ետք Նախարար Պաղըշ շնորհաւորեց Նորին Սրբազնութիւնը իր Պատրիարքական Ընդհանուր Փոխանորդ ընտրութեան առթիւ։ Ան փափաք յայտնեց նաեւ այցելել Ն.Ա.Տ. Մեսրոպ Պատրիարք հայրը, ուր ընդունուեցաւ Տիրամայր Մարի Մութաֆեանի կողմէ։ Մեծայարգ Նախարարը այստեղ անդրադարձաւ Պատրիարք Հօր համայնքին ու երկրին մէջ ունեցած արժէքին եւ յատկապէս Թուրքիոյ Եւրոմիութեան անդամակցութեան համար ցուցաբերած անմոռանալի աջակցութեան։ Ան բարեմաղթութիւններ ըրաւ Տիրամօր եւ առողջութիւն մաղթեց Նորին Ամենապատուութեան։

Ապա, Նախարար Պաղըշ եւ իր ուղեկիցը մտերմիկ ճաշասեղանով ջերմ մթնոլորտի մէջ հիւրասիրուեցան Բարձր. Տ. Արամ Ս. Արքեպս. Աթէշեանի կողմէ։

Այս ոչ-պաշտօնական այցելութենէն ետք, Նախարար Պաղըշ շնորհակալութիւն յայտնեց ընծայուած ընդունելութեան համար ու գոհ տպաւորութեամբ հրաժեշտ առաւ Պատրիարքարանէն։